Arkitektnytt

Ein sentral skilnad mellom ein prosjektkonkurranse og eit parallelloppdrag er at ein kårar ein vinnar i konkurransar. Det gjer ein ikkje i parallelloppdrag. Dette er så å seie det universelle prinsippet, men ein kan altså finne unnatak.

Frå parallelloppdrag…

Olavsgaard Eiendom AS inviterte i mars fire arkitektgrupper til ein «åpen honorert idéutviklingsprosess» om byggjing av bustader på tomta Masserud Gaard. Meininga med parallelloppdraget var å få «flere innspill og ideer til den videre prosessen med utvikling av eiendommen», slik det står i juryrapporten.

Juryen ønskja seg bustader i eit moderne formspråk med variasjon og mangfald, som høver til den eksisterande busetnaden i området.

Tre av dei fire inviterte laga leverte. Det var Dark Arkitekter AS, LMR Arkitektur AS og Lillestrøm Arkitektkontor AS. Framlegga deira synte ulike måter å bruke tomta på og gav eit breitt bilete og «gode tips på veien i den videre prosessen», seier juryen.

Dark plasserte 86 bueiningar på Masserud Gaard-tomta, 27 i form av kjeda einebustader midt på tomta og 59 leilegheiter, delte mellom terrasserte leilegheiter lengst sør på tomta og høgare blokker nordaust på tomta.

… til vinnarkåring

Etter presentasjonen av dei tre utkasta, og deretter ei samanlikning, kjem oppsummeringa, der det står: «Selv om det i invitasjonen er gitt uttrykk for at det ikke vil bli kåret en vinner, utrykker komiteen følgende: Alle tre har løst oppdraget tilfredsstillende og kunne med mindre tilpasninger vært realisert. Dog mener komiteen at én løsning scorer høyest både hva angår...»

Det er løysinga til Dark Arkitekter. Ho var best på overordna grep, vurdering av areala, tilpassing til den eksisterande busetnaden og gjennomføringspotensial.

Slik er den endelege konklusjonen: «Evalueringskomiteen mener Dark Arkitekter AS har den løsningen som oppfyller flest av de kriteriene komiteen har lagt til grunn.»

For Dark arbeidde arkitektane Merete Hoff, Rakel Helling, Simona Ferrari, Tor Falch, Daniel Ferdman, Odin Monje Lapholm  og landskapsarkitekt Elin Resch. Praktikantane Emil Modeer og Joakim Wassum Imset laga modell, medan visualisering var ved Ingelin Bakken.

I evalueringskomiteen sat Carl Frode Fjellheim og Øyvind Henriksen frå Olavsgaard Eiendom AS, grunneigar Reidun Masserud attåt sivilingeniør Erik Prøsch frå Øvre Romerike prosjektering.

— Deltaking i konkurranse utan å vere klar over det

Arkitektnytt spurde konkurransesjefen i NAL, Per Rygh, om ein kommentar til bruken av omgrep i tevlinga.

«Dette er nok et eksempel på at oppdragsgivere ikke har den ønskede forståelse av hva et ‘parallelloppdrag’ innebærer, eller ikke har den nødvendige lojalitet i forhold til de premisser deltakerne har fått seg forelagt,» svarar Rygh og gjer problemstillinga klarare:

«Her sier man altså tydelig at man inviterer til et parallelloppdrag der det ikke skal kåres noen vinner eller tildeles noen etterfølgende kontrakt, men at man anser prosessen kun som en mulighetsstudie for å få frem ideer og innspill til en videre utvikling. Likevel kårer man altså en vinner. Hyggelig for vinneren, selvsagt, men de andre deltakerne vil nok stusse over at man faktisk har deltatt i en konkurranse uten selv å være klar over det. En slik manglende forutberegnelighet er uheldig.»