Svar til Bane Nor Eiendom
Det økonomiske reknestykket for riving og nybygg går nok opp, men klimagassrekneskapet har i følge våre innleiande analyser berre raude tal, skriv seniorarkitekt Gunnar Aasen Rogne til Bane Nor Eiendom.
Først vil eg takke for svaret, det er bra at ein av Norges største eigedomsutviklarar er med i det offentlige ordskiftet.
Når du skriv at den einaste løysinga i Strandgata 19 er å rive for å sette opp eit nybygg så set du fingeren på hovudproblemet i denne saken.
Har Bane Nor Eiendom undersøkt reelle moglegheiter for transformasjon? Bygget har tydelege løysingsforslag innanfor det eksisterande beresystemet. Netto etasjehøgde er i overkant av 2100 mm. Fjernar du ei halvetasje med prefabrikerte betongelement får du over 4 meter takhøgde. Fjernar du to får du eit over seks meter høgt rom - midt i byen. Dette er jo ein kjemperessurs for alle som klarer å sjå litt alternativt på utfordringa. Det er ikkje sikkert at eit kontorbygg er det mest samfunnsnyttige programmet for denne adressa. Kvadraturen og Bjørvika er full av kontorbygg - kva med å lage noko for dei som ikkje jobbar på kontor?
Energi- og klimarådgiver Una Myklebust Halvorsen skriv i sitt innlegg at ein høgst usikker klimagevinst ved eit slikt prosjekt kjem først om seksti år. Når du skriv at “redusert bilbruk vil ha en høy effekt på CO2-utslipp utover bygningskonstruksjonen i et nybygg” så er dette ein usikker påstand. Som Myklebust Halvorsen skriv så oppfører ikkje folk seg alltid slik vi vil og kutt frå utslepp i transport er dei mest usikre tala i klimagassrekneskap.
Det økonomiske reknestykket for riving og nybygg går nok opp, men klimagassrekneskapet har i følge våre innleiande analyser berre raude tal. Om du har andre tal som viser klimagevinsten du snakkar om hadde det vore interessant å diskutert dette vidare, men enn så lenge er dette prosjektet eit sidespor på turen mot Paris.
Gunnar Aasen Rogne
seniorarkitekt