"Televisjoner" for Øyfjell i Vinje
Rintala Eggertson Arkitekter og arkitekt Sverre Sondresen har teikna prøvebustad for Øyfjell i Telemark, som ei moderne reformulering av det lokale arkitektoniske språket.
Vinje kommune skal byggje bustaden i Øyfjell i løpet av 2009. Unge menneske kan så leige husa av kommunen, for eitt eller to år, om dei vil prøve å etablere seg i bygda. Målet er å hindre fråflytting og trekke nye innbyggjarar til Vinje kommune. Husbanken støttar elles prosjektet.
Den norske byggeskikken er rik på dialekter og høvelege formsvar for konkrete stader. Ein finn gode døme på landskapstilpassing, prefabrikering (laft- og grindkonstruksjonar), passiv energiutnytting, energiøkonomisering og gjenbruk av material. Byggeskikken dreier seg om estetikk, men langt meir om bærekraft, seier arkitektane bak ”Televisjoner” i prosjektframlegget.
Dei har utforma pilotbustaden i Øyfjell som ei nytolking av den tradisjonsrike, gamle arkitekturen i Telemark. Husa er planlagde for ”compact living” med lite fotavtrykk på staden, energiøkonomiske løysingar, bruk av lokale material og vidareutvikling av det lokale handverket. Ein satsar på eit elementsystem som kan gje ulike løysingar og rom for utvidingar ved seinare høve.
Arkitektane bak prøvebustaden er MNAL Sverre Sondresen, Sami Rintala, MNAL Dagur Eggertsson og MNAL Vibeke Jenssen.
Heile prosjektframlegget finn du her.
