Arkitektnytt

Audun Moflag valde å gå av, og som nytt fast medlem kom Hege Solli inn. Ho hadde vore fyrste vara i førre periode. Elles er det nye forbundsstyret identisk med det vi hadde i perioden før.

Møte i storm
Før styremøtet fekk forbundsstyret oppleva snøstorm på Vestlandet. Heile fyrste dagen av møtet var sett av til ein rundtur på Karmøy. Det var naturleg å byrja med Nordvegen Historiesenter på Avaldsnes. Senteret, som er teikna av Telje–Torp–Aasen Arkitektkontor AS, er Rogaland fylkes tusenårsstad. Utstillingane i senteret er produsert i eit samarbeid mellom SixSides og Hybris Film Vertigo. Senteret blei opna av Dronning Sonja i april 2005.

I senteret fekk forbundsstyret orientering om prosjektet ved prosjektleiar Marit Synnøve Vea i Karmøy kommune. Etter lunsj på senteret bar det så ut i snøstormen og ned til Vikinggarden på Avaldsnes. Her har Karmøy kommune over fleire år bygd opp ein verkelig vikinggard med langhus, stort naust og ei rekkje mindre bygningar. Arbeidet har skjedd i nært samarbeid med arkeolog og arkitekt Jochen Komber.

Frå Nordvegen bar det vidare til Karmøy fiskerimuseum, eit spennande bygg som Snøhetta har hatt ansvar for. Museet ligg i bygda Veavåg. På vegen sørover mot Skudeneshavn drog vi også ned til Ferkingstadhamn, eit særprega naustmiljø kring ei kunstig hamn, der vi kunne sjå på dei mektige bylgjene som slo inn over moloen.

Det var tett snødrev då vi kom til Skudeneshavn, så rundturen gjennom trehusbyen Gamle Skudeneshavn gjekk raskare enn han vanlegvis gjer. Likevel fekk forbundsstyret eit godt inntrykk av det særprega miljøet som ein kan oppleva i denne vesle byen, som Nitimen har kåra til "Noregs sumarby".

Om kvelden drog vi til Vigsnes Grubemuseum. Her på vestsida av Nord-Karmøy blei det drive kopargruver frå 1865 og med nokre avbrot like til 1972. Staden er no museum, og inne i den gamle kontorbygningen blei vi servert "funksjonærmeny" lik ein som direktøren ein gong serverte sine funksjonærar.

Fyrst langt ut på kveld drog forbundsstyret inn til Haugesund og hotellet der.

Konstituering
Dagen etter var det ei lang og viktig saksliste for forbundsstyret. Då dette var det fyrste ordinære møtet, var det naudsynt å gå gjennom ein del formalitetar. Dette inneber mellom anna at styret blir konstituert med alle utval. Forbundsstyret bestemde seg for å oppretthalda arbeidsgjevarutvalet. Dette utvalet tek seg av AFAG si rolle som arbeidsgjevar for dei tilsette i sekretariatet. Vidare blei også dei to forhandlingsutvala, for privat og offentleg sektor, oppretthaldne.

Det var heller ikkje store diskusjonar om å oppretthalda profileringsutvalet, medan det blei oppretta eit nytt utval som skal arbeide med strategiar for den framtidige utviklinga av forbundet. Sentrale spørsmål for dette utvalet er korleis AFAG skal utvikle seg som medlemsorganisasjon, og behovet for å utvide relasjonane til andre organisasjonar. For medlemmene er det tenestene og servicen som er viktig. Med ein kontinuerleg straum av nye medlemar blir det stadig større utfordringar for sekretariatet. Nye utdanningar begynner å dukka opp på undervisningsstadene. Dette setter spørsmålteikn ved den gamle laugstankegangen. For AFAG er det derfor viktig å førebu for val av kven organisasjonen skal vera til for. For stor spreiing i medlemsmassens fagbakgrunn kan skapa mindre identitetskjensle, men kan samtidig sikra ein jamn vokster. Forbundsstyret ser også at satsinga på studentar berer frukter. Men her er AFAG i ein hard konkurranse med andre forbund – også organisasjonar utanfor dei som er naturlige for arkitektar.

Til konstitueringa høyrer det ogsïå med å peika ut "redaktør" for artiklar som skal inn til Arkitektnytt. Dette ansvaret betyr både å halda orden på kven som skal skrive kva til det einskilde nummeret, og å vera ein pådrivar for å få artikkelstoffet inn til rett tid. Det siste punktet under konstituering var å finna representant til styret i Akademiet.

Ansvarsdeling
På sakslista sto også budsjettet som blei vedteke av landsmøtet i Trondheim. Der blei det vedteke å opna for eit reisestipend for studentar. Då 2006-budsjettet vil vera i pluss, var det mogleg å leggja dette rett inn. Men budsjettet for 2007 trong nokre mindre justeringar på einskildpostar for å vera i balanse.

Dagen var også satt av til gjennomgangen av prinsipp- og handlingsprogrammet. Det viktige med denne saka er å fordela ansvar og oppgåver til dei einskilde forbundsstyremedlemane og dei ulike utvala. Det vil våre forbundsstyret som heile som vil ha det overordna ansvaret, og slik sett vil det vera eit samarbeid om å løysa oppgåvene dei to neste åra. Men utan ein person med spesielt ansvar for framdrift, er vår røynsle at det er fleire oppgåver som lett blir gløymde. Fordeling av ansvar blir i forbundsstyret sett på som naudsynt for å skapa kollektiv ansvarskjensle, medverknad og engasjement. Ikkje alle sakene blei ferdig handsama på laurdagen. Nokre saker måtte ein ta på sundag formiddag.

Slike lange, intense og opplevingsrike helger skapar eit godt grunnlag for godt lagarbeid og hjelp godt til med å skapa det rette engasjementet for dei oppgåver som ligg framfor styret.