Arkitektnytt

Iglo skal samle næringslivsaktørar, organisasjonar, dei som tek avgjersle, og folk flest til heilskaplege diskusjonar for å fremje ein bustadpolitikk for framtida. Det skal skje gjennom debattmøte og utlegging av artiklar på nettsida til Iglo.

Statsvitar og rådgjevar Erik Lundesgaard og eigedomsrådgjevar Mikkel Røisland er initiativtakarane til bustadforumet. Dei vil prøve å setje bustadpolitikk på agendaen fram mot stortingsvalet i 2013.

– Kompleks marknad

Mikkel Røisland ønskjer seg ein meir strukturert bustaddebatt, ifølgje nettstaden til Iglo, der dei to initiativtakarane intervjuar kvarandre:

«Iglo er for meg et prosjekt som skal forsøke å organisere debatten. Det sparkes i mange retninger, og hvis vi kan klare å samle aktører og interesserte, så tror jeg at vi kan legge et grunnlag for en mer strukturerende debatt. For boligmarkedet er et svært komplekst marked. Slik kan politikere, beslutningstakere og folk flest se et helhetlig bilde av problemstillingene. Med bakgrunn i det håper jeg at vi kan bidra til å skape politikk som gjør at vi får et mer velfungerende boligmarked,» seier Røisland.

– Ikkje «bolig-sosial politikk»

«For meg er det også et generasjonsspørsmål,» seier Erik Lundesgaard og peikar på at mange unge i dag risikerer å ikkje kunne kjøpe seg ein eigen bustad. Ein treng flaks eller arv for å få ein stad å bu, og det er ikkje ein bra situasjon. Vi treng difor å utvikle ein ny bustadpolitikk, meiner Lundesgaard, utan at han med det siktar til «bolig-sosial politikk», slik ein har brukt omgrepet sidan 90-talet om ein politikk for berre gjeld tre prosent av befolkninga. Iglo skal tale vanlege bustadkjøparar og leietakarar si sak.

Dei to initiativtakarane kallar prosjektet sitt idealistisk, men har solide økonomiske støttespelarar frå eigedoms- og utbyggjarbransjen i ryggen til drift av nettsida og arrangement av møte.

Forumet hadde sitt første debattmøte tysdag 14. februar i Mathallen på Vulkan i Oslo. Ei imponerande rekkje leiarar og toppfolk stilte opp. Første del baud på innleiingar over temaet: «Utfordringer for boligmarkedet i dag og i fremtiden.» Andre del, etter pause, var ein paneldebatt over temaet: «Trenger vi en revitalisering av boligpolitikken?» Det er vel ikkje urimeleg å tru at fleire svara ja.

Sjå nettstaden til Iglo her.