Arkitektnytt

På nettsida til Husbanken kan ein no lese at Husbanken «bruker prosjektdatabasen til Norske Arkitekters Landsforbund (NAL) for å vise forbildeprosjekter», i tillegg til «andre interessante forbildeeksempler». Per Anda, prosjektleiar for databasen til Ecobox sidan hausten 2010, seier seg godt nøgd med samarbeidet med Husbanken. Det har enno ikkje  munna ut i ei formalisert avtale, men ho vil kome, opplyser han.

 

Gløymt kreditering

Rett nok har Husbanken publisert Ecobox-prosjekt utan å opplyse at Ecobox er kjelda, under kvar einskildpresentasjon, men det kallar Anda ein «web-teknisk glipp».

 

– Versjonen til Husbanken vil bli endra. Det er rimeleg å seie kven som er eigar av materialet, slår Per Anda fast og opplyser at utvekslinga går begge vegar. Snart vil Ecobox publisere prosjekt frå Husbanken, med kreditering.

Departementalt krav til Husbanken

– Det er nyttig for oss å vise fram førebileteprosjekt frå Ecobox-databasen på heimesida vår. Vi har felles interesse av ein database med felles bidrag, seier Øyvind Johnsen, fagdirektør i Husbanken, og sluttar seg til at samarbeidet er godt.

 

Husbanken er pålagt av Kommunal- og regionaldepartementet, gjennom tildelingsbrevet for 2011, å stimulere til bygging av fleire miljøvenlege bustader gjennom «mellom anna forsking, utviklingsprosjekt og førebileteprosjekt», å føre samarbeidet med NAL/Ecobox vidare «med sikte på å avklare eigarskapsmodell og juridiske problemstillingar slik at prosjektdatabasen kan kome over i ein ordinær driftsfase», og til å støtte prosjektdatabasen til NAL/Ecobox «med inntil kr 400 000».

 

Per Anda ser det som viktig at Ecobox, som ein ikkje-statleg instans, blir teke med i statlege dokument. At Husbanken disponerer økonomiske middel, gjer han til ein mykje viktig samarbeidspartnar for Ecobox, som treng pengar for å gjere prosjektbiblioteket sitt tilgjengeleg for flest mogleg.

 

Ecobox som nasjonal instans?

Prosjektleiaren ønskjer også å samarbeide med fleire aktørar enn Husbanken om å registrere og publisere førebileteprosjekt.

 

– Ecobox vil gjerne ha ei sentral rolle i bygginga av ein nasjonal instans, seier han og dreg fram at Ecobox har kompetansen og erfaringa som ein her treng, etter snart ti år med publisering av gode prosjekt i høve energi, miljø og stadsutvikling. NAL har elles dokumentert alle typer prosjekt i tidsskrifta sine frå tidleg på 1900-talet.

 

– Registreringar krev fagkunnskap og omfattande arbeidsinnsats. Det det kan vere mykje å vinne på meir samarbeid for ei heilskapleg formidling.